Mga nag-abot nga OFW sa Bacolod wala nadayon sa hotel nga ila kuntani tiniran bangud ginbalabagan

25

Wala nadayon ang paggamit sang Luxe Residences sa Purok Acacia, Gatuslao St., Brgy. 15, Bacolod City bilang quarantine facility sa 19 ka mga returning Overseas Filipino Workers (OFWs) matapos ginbalabagan sang mga barangay officials partikular na ni Punong Barangay Anjo Ayco.

Sa interview naman sang DYHB kay Kagawad Mardinovi Peregrin, wala nakapakig-angot sa barangay ang city officials nga himuon quarantine facility ang building kag ila lang ini natukiban sang nakita nila kahapon nga madamo nga salakyan ang nagasulod kag nagapreparar sang lugar para sa pag-abot sang mga OFWs.


Ginapamatukan sang barangay officials ang paghimo quarantine facility sa Luxe Residences bangud nahamtang ini sa downtown area, madamo ang nagalabay nga tawo, malapit man diri ang parking area sang mga jeep nga may ruta Magsungay-Central Market, kag may boarding house pa sa likod sang amo nga building.

Nagakahangawa ang barangay officials nga sa tion may isa ka OFW nga mag-positibo sa COVID-19, mabutang sa peligro ang kabuhi sang mga tawo sa palibot.

[image: image.png]

Facebook Comments