General Santos City–Usa matud pa ka nindot nga regalo ang mga kadaugang nasakmit sa Police Regional office-12 sa bag-ohay lang nahuman nga 118th Police Service Anniversary alang sa pagretero ni Police Brigadier General Eleseo Tam Rasco isip opisyal sa PNP.
Sumala pa niini nga mamahimo niyang legasiya sa rehiyon 12 ang maong mga pasidungog nga nakuha sa iyahang mga sakop ilawom sa iyahang pagdumala.
Nasayran nga nasakmit sa rehiyon 12 ang Best Provincial Police Office pinaagi sa North Cotabato Provincial Police Office, Best City Mobile Force Company nga nasakmit sa General Santos City Police Office, Best Provincial Mobile Force Company nga nasakmit sa Sarangani Provincial Police Office, Best Municipal Drug Enforcement Unit nga nasakmit sa Polomolok Municipal Police Station ug best Regional Advisory Council.
Samtang ayha kini moretiro sa umaabot nga Setyembre 13, mihatag kini ug mensahe sa iyahang ginsakopan nga tarungon ang pag panarbaho ug buhaton ang sakto aron nga mamahimong maayo ang resulta.
Wala usab nasayod si General Rasco kung kinsa ang mohulip kaniya isip Regional Director sa PRO-12 apan masaligon kini nga ipadayon gihapon sa musunod kaniya ang iyahang maayong nasugdan sama sa pagpadayon niini sa mga maayong nasugdan sa iyahang gipulihan.(Dave Silagan)
