Mga operasyon batok sa nagkadaiyang kriminalidad sa siyudad sa Malaybalay, ginapadayon sa kapulisan

17
Giklaro karon sa kapulisan sa Malaybalay City nga nagapadayon ang ilang pagronda sa bisan-asang bahin sa siyudad aron nga mabatokan ang pagkaylap sa kriminalidad.

Sa interview sa RMN Malaybalay ngadto kang Police Executive Master Sergeant Alexander Calma, sa Malaybalay City Police Station, gibutyag niya nga nagpadayon ang ilang police visibility sa mga lugar sa siyudad nga posibleng dagsaon sa katawhan aron usab nga masiguro ang seguridad sa katawhan.

Nagapadayon usab ang ilang mga operasyon batok sa mga illegal nga mga aktibidad sa dakbayan ilabi na mga illegal nga sugal, droga, ug uban pa.

Nikunhod matud pa ang pagkatigayon sa mga krimen sa dakbayan.

Mipahimangnu usab ang kapulisan ilabi na nga nagsingabot ang kapaskuhan ngadto sa katawhan nga magmabinantayon tungod kay posibleng mukatag na usab ang mga mangunguot sa siyudad.

Bag-ohay lang sumala pa nga adunay babae ang nabiktima sa pagpanguot sa usa sa mga establisyemento sa siyudad apan naneutralize ra gihapon sa kapulisan human maitaho ang maong insidente sa mga nakastandby nga kapulisan sa maong area.

Facebook Comments