Militant recruiters gikondena

26

Davao City – Matud sa 10TH Infantry Division – Philippine Army, angay lamang kondinahon ang militanteng grupo ug ang grupong CPP-NPA-NDFP gumikan sa ilang pagpang-recruit og mga batan-ong estudyante ug kabataan aron mo-abin diha sa mga militant youth organizations ingon man sa mga legal fronts sa kalihukang komunista.

Segun ni 10th ID Spokesperson Capt. Jerry Lamosao, giguba sa mga militante ug sa mga rebelde ang kaugmaon ug kinabuhi sa mga estudyante maong dapat lamang silang panghimaraoton.


Sumala ni Lamosao, dapat lamang kasohan ang mga recruiters nga naghimo sa mga estudyante nga kabahin sa walhong kalihukan ug mahisakop sa armadong pakigbisog batok sa gobyerno.

Samtang baruganan ni Lamosao nga dapat ipaagi sa hustong proseso sa balaud ang pagtangtang sa scholarship grants sa mga estudyante nga nagpamiyembro sa militanteng pundok ug nakiggiyera na hinoon sa gobyerno didto sa kabukiran.

Kahinumdoman nga pipila ka mga inahan ang nagpatabang kang Sen. Ronald ‘Bato’ Dela Rosa aron ma-imbistigahan sa Senado ang pagkahanaw kun pagka-missing sa ilang mga anak human miuban sa militanteng grupo.

Ang mga anak sa mga inahan nga midangop kang Dela Rosa nagtungha sa mga unibersidad nga iya sa kagamhanan dihang nadani silang muapil sa militanteng grupo sama sa Anakbayan ug League of Filipino Students (LFS) hangtud misampa sa armadong pakigbisog kontra sa kagamhanan.

RadyoMaN Joel Viray

Facebook Comments

From Advertisers