Militant youths gipikhan usab si Duterte

23

Davao City – Gikonsidera na karon sa militanteng Anakbayan nga tinuod nga kaaway sa katawhan si Pres. Rodrigo Duterte.

Ang pagdeklara sa Davao City Council nga ‘persona non grata’ si Sen. Sonny Trillanes nagpadan-ag lang nga ang tinuod nga kalaban sa mga tawo mao mismo si Duterte.

Matud ni Anakbayan-Southern Mindanao Region focal person Romen Wabina, ang lakang sa city council nagpamatuod lamang sa dictatorial tendencies ni Duterte.

Matawag nga pang-ipit sa bahin sa mga mikontra sa administrasyon ang ‘persona non grata’ declaration busa dili malilong nga nahimong tuta ni Duterte ang konseho ug ang lokal nga kagamhanan.

Dili lamang ang senador ang giipit sa kagamhanan karon apan lakip na ang mga aktibistang kabataan human gimando ang crackdown batok kanila.

Gipaboran sa batan-ong militante ang pamahayag ni Trillanes nga grabe ang pinatyanay ug lugos ug pinakapiligro ang dakbayan sa tibuok nasud sa Pilipinas.

Ug tungod sa walay hunong nga atake ni Trillanes batok sa gobyerno makita na daw ang pagkatunga tali sa administrasyon ug sa mga oppositionist kun Liberal Party diin ang napagan ang yanong lungsoranon.

Bug-at ra kaayo ang pagdeklara og persona non grata kay pwede kini mutapos sa mga kritiko kinsa nagpadayag og diskontento sa kadumalahan sa gobyerno sama sa kanhi lider sa Magdalo.

Kung nagmalampuson man si Duterte sa pagkimpang kang Trillanes pinaagi sa pagdeklara og persona non grata dili niya kini mabuhat sa mga militante tungod andam daw nila kini batukan.

RadyoMaN Joel Viray

Facebook Comments