Militar ug NPA subling nagka-engkwentro sa Bukidnon

Nagka-engkwentro ang tropa sa kasundaluhan ilawom sa 8th Infantry Battalion, Philippine Army ug mga rebeldeng New Peoples Army kon NPA ala 1 kapin sa hapon kagahapon.

Sa interview sa RMN Malaybalay ngadto kang Lt. Kenneth Cabiggat, ang civil military operations officer ug spokesperson sa 8th IB gibutyag niini nga nahitabo ang engkwentro sa Sitio Miaray, Canangaan lungsod sa Cabanglasan.

Nahitabo matud pa kini human nga naghimo ug pagpatrolya ang tropa sa kagamhanan tungod sa nadawat nga taho sa mga sibilyan nga adunay mga NPA ang naghimo ug extortion activities.


Gikondena usab ni Cabiggat ang paggamit sa mga NPA sa landmine nga gibawal sa international humanitarian law.

Nibusikad matud pa ang usa ka landmine samtang wala kabuto ang laing usa pa.

Sigun ni Lt. Cabiggat nga mukabat sa lima ka mga NPA ang ilang naka-engkwentro.

Nidagan matud pa ang mga rebelde ayha nagpabuto sa landmine.

Una niini gikataho sa NPA nga gipabusikaran ug command detonated nga bomba ug pagpamusil gamit ang tag-as nga armas sa NPA Bukidnon ang usa ka bag-ong gitukod nga detachment sa maong nga dapit. Una nang gipasiatab sa NPA nga adunay 7 ka casualty sa sundalo ug CAFGU butang nga gihimakak sa 8th IB.

Giklaro ni Lt. Cabiggat nga walay natalang samdan o kaha namatay sa tropa sa gobyerno.

Facebook Comments