General Santos City—kritikal ang kondisyon sa 16 anyos nga habal-habal driver human kining gipusil sa riding in tandem sa may prk. Saludin, Barangay Labangal Gensan.
Ang biktima nailang si alias Jan-jan 16, residenti sa Prk. Palen, Barangay Labangal Gensan.
Sa inisyal nga imbistigasyon sa Makar PNP nasuta nga alas 11:30 ang takna sa gabie dihang pauli na unta ang biktima ngadto sa ilang panimalay gikan namasada, pag abot sa may Prk. Saludin partikular sa ngitngit nga dapit daplin sa sapa, siya gitaparan ug duha ka mga suspek nga nakamotorsiklo dayon gipusil kapila ka higayon.
Nakaangkon ug samad sa iyang dughan, kilid ug ulo ang nasampit nga biktima. Paspas nga misibat ang mga suspek sa wala sayring lugar.
Ang biktima gitabangan sa mga nangagi sa maong lugar nga madala sa St. Elizabeth Hospital. Gilayon usab nga giatiman sa iyang attending physician ang nasampit gumikan sa mga samad nga naangkon niini.
Sa karon padayon ang gihimong imbistigasyon sa kapulisan kalabutan sa insidenti samtang ginasuta pa sa otoridad ang posibling motibo sa krimen.
Ginasuta pa usab ang background sa nasampit nga biktima sa ilang lugar kansa makatabang matud pag dako sa kapulisan sa pagtumbok sa motibo sa krimen.
