Misis malakat ngadto ha ibang bansa para magtrabaho, mister nagpakamatay

TACLOBAN CITY – Nahikalasan an pamilya han 33 anyos nga lalaki ha Brgy. 3 Upper Nula-tula Tacloban City matapos nga makit-an ini nira nga nakahigot na hin naylon an liog ngan waray na kinabuhi.

Ginkilala an nagpakamatay nga hi Raul Tabontabon, mayada live-in partner, may usa nga anak ngan residente ha Brgy. 73 Nula-tula.

Ha imbistigasyon han Tacloban PNP Station 2 Abucay, alas 10:00 han aga dida han byernes nahinabo an insidente, naghikog hi Tabontabon ha bungbong han yero ha panimalay han iya bugto.


Ha Eksklusibo nga interview han RMN kan PCInsp. Elmer Jabiñar, Tacloban PNP Station 2 commander, nagpakamatay hi Tabontabon tungod nga lumakat an asawa hini tipakadto ha langyaw nga nasod para magtrabaho.

“It asawa hini adto na ha Manila, tilakat na liwat ini tipakadto ha ibang bansa para magtrabaho. An istorya han magurang (bugto han biktima), nadiri an iya manghod nga lumakat na liwat an iya asawa.”

Dida han tuig 2015, sumala han pamilya ni Tabontabon, nag-attempt liwat ini nga magpakamatay ha pareho nga rason nga makadto an asawa hini ha ibang bansa para magtrabaho.

Napugngan han pamilya hini nga magpakamatay hi Tabontabon pero an yana nga panhitabo nga paghikalasi han pamilya.

Nabaruan pa han RMN nga gindul-ong pa ngayan ni Tabontabon an anak hini ngadto ha eskwelahan antis nga magpakamatay.

Nagrequest an Tacloban PNP ha pamilya nga igpa-autopsy an patay nga lawas pero waray na tumugot an pamilya.

“Naghimo kita hin request para hin autopsy pero nagdecline na hira nga igpa-autopsy kay kumbisido man hira nga waray [foul play], waray iba nga hinungdan kundi hiya la mismo an nag-awat han iya kinabuhi.”

Facebook Comments