Misis, nakitang hubeas ag uwa eon it kabuhi

Malinao, Aklan — Uwa eon it kabuhi ag hubeas tag makit-an kainang agahon rong sangka misis sa maligwin nga lugar it Sitio Capisi, Brgy. Dangcalan, Malinao, Aklan.
Ro biktima nakilaea kay Eva Collantes Adan, 41-anyos ag residente man it nasambit nga lugar.
Base sa report nga naalarma rong pamilya ag mga opisyales it barangay matapos nga uwa naka uli rong misis ko nagtaliwan nga gabii halin sa anang ubra.
Insigida nga nag report sa Malinao PNP rong asawa kara ag nagpatigayon it pag usoy ag bangud nga mabaskog rong uean hay uwa man makita raya ag ginpundo rong pag ilinusoy.
Kainang agahon hay ginpadayon rong pag usoy dayon nga nakita nga naga kaya ag hubeas ag patay eon.
Nakita man mga 50 metros halin sa bangkay rong bag ag gamit it biktima pero uwa eon ro anang cellphone.
Sa pagpangusisa it RMN News Team nasayuran nga kahapon hay nakita ni alyas Jun samtang imaw naga motor paadto sa anang ubra nga may sangka babayeng naga hapa ag may nagatalikod nga eaeaki nga nagatindog sa tupad it babaye nga naka green it eambong ag kulay gatas nga short kung sa siin may buyot nga tubo, nag deritso mat a imaw ay eaom nana hay mga away mag asawa ay uwa man nana makilaea pero bago imaw mag diretso sa ubra hay naghapit imaw sa Malinao PNP para ireport do anang nakita.
Samtang suno mat a sa live in partner it biktima nga si Russel Redondo nga kahapon hay naghalin ro biktima sa anda mga pasado ala 7:00 it agahon para magsueod sa ubra.
Nasayuran nga bago ra makasakay it motorsiklo paadto it banwa hay dapat nga magbaktas pa anay paguwa ay uwa it naga agi nga motorsiklo sa anda banda.
Sa ginpatigayon nga pagpangusisa it SOCO Aklan sa bangkay it biktima nakitaan raya it tatlo ka mga tama it pagbunae it matig a nga bagay sa anang uyahon ag ueo nga posible gintunaan man ko anang kamatayon.
Ginapanan-aw man nga basi ginhimuslan anay rong biktima bago pinatay.
Sa pagsunod it RMN News Team sa mga kapulisan sa ginpatigayon nga follow up nasayuran sa hipag it biktima nga may naga tinext sa biktima ag may una nga pagnanasa.
Nasayuran pa gid nga may una man nga nakaaway sandang mag live in.
Sa makaron hay may lead eon ro atong mga otoridad ag may makabig nga person of interest sa nasambit nga krimen.
Hin-aga nakataeana nga igapaidaeom sa autopsy examination rong bangkay it biktima para masayuran gid kon ano ro anang ginkamatay ag baea imaw ra hay ginhinuslan.
Padayon pa man rong imbestigasyon it mga kapulisan angot sa nasambit nga krimen.

Facebook Comments