Miyembro sa NPA nga gituohang mubabag unta sa Medical team nga mahidangat sa Upper Suyan Malapatan naka-engkwentro sa Militar

General Santos City–Patay ang usa ka miyembro sa NPA atol sa natigayon nga engkwentro tali sa tropa sa Alpha Company sa 73rd Infantry Battalion sa Sitio Sulkeli, Barangay Kihan, Malapatan, Sarangani Province buntag sa adlawng Hwebes.

Gibutyag ni 1st lt. Jerry Maborrang Spokesperson sa 73rd Infantry Battalion, Philippine Army nga nangandam ang mga sundalo sa paghatag ug seguridad sa mga medical team nga gipadala sa Upper Suyan Malapatan, dihang namatikdan ang presensya sa mga rebelde.

Gilayong girespondihan ang lugar diin mukabat ngadto sa 20 minutos ang binakbakanay nga gikamatay sa usa ka miyembro sa NPA nga nailhan lang sa Apelyedo nga Bujong nga taga Davao Occidental.


Gibutyag pa ni 1st Lt. Maborrang nga dako ang ilang pagtuo nga posibling planong babagan sa mga armado ang medical team nga makaabot sa Upper Suyan, Malapatan, Sarangani province aron sa pagpahigayon ug Vaccination ug pag-atiman sa mga nabiktima sa measles outbreak.

Swerte lang nga gilayon nilang nasayran ang presensya sa maong grupo mao nga natigayon ang bakbakan.

Sa kasamtangan ginahuwat pa sa militar ang pamilya sa miyembro sa NPA nga una nang napatay sa maong operasyon. Samtang malampuson usab nga nakaabot nga luwas sa Upper Suyan ang Medical team nga gipadala sa Sarangani Provincial Health Office nga maoy mututok sa Measles outbreak nga natigayon sa maong lugar.

Facebook Comments