Davao City – Mas makapasamot lamang sa insurhensiya sa Pilipinas kung isunod gyerahon sa tropa sa gobyerno ang New Peoples Army (NPA) human sa teroristang Maute group.
Kini maoy baruganan karon ni Moro National Liberation Front (MNLF) spokesperson Atty. Emmanuel Fontanilla sa laraw ni Presidente Rodrigo Duterte nga isunod og target ang pagtapos sa NPA ilawom sa landong sa National Democratic Front of the Philippines (NDFP).
Segun kang Fontanilla, mamahimong pabilo lamang ang giyera aron masindihan ang kasilag ug kasuko sa mga kabanay sa mga NPA nga mapatay unya sa mga sundalo kun mahitabo ang gubat batok kanila.
Dugang sa tigpamaba sa Moro group, dili maayo nga magpinatyanay ang mga Pilipino tungod lamang sa managlahi nga baruganan ug ideolohiya ug pagtoo sa matag usa.
Usab si Fontanilla nangatarongan nga dili angay isipon kun i-konsidera nga kriminal kun kontra sa estado ang CPP-NPA-NDFP sanglit adunay bug-at nga rason nganong nagrebelde ang pipila ug angay suta-on sa kagamhanan ang ugat-hinungdan niini inay nga gyerahon.
Ang spokesperson nagkanayon nga ang kamatooran mao nga bisan pa og mahurot og kamatay sa giyera ang mga sakop sa CPP-NPA-NDFP, magpabilin nga buhi ang ilang ideolohiya ug pagtoo nga maoy tulay aron motubo gihapon ang kalihukan.
Imbes nga giyera, hikutaron na lamang sa gobyerno ang pagpangita og pamaagi aron masulbad ang pinaka-rason sa ilang pakigbatok sa kagamhahan aron sa ingon matuldukan na ang suliran sa insurhensiya sa nasud sa malinawon nga paagi.
Nanawagan ang Moro spokesperson ngadto kang Pres. Duterte nga i-konsidera ang subling pag-abli sa pultahan sa hinabing pangkalinaw uban sa CPP-NPA-NDFP sa ngalan sa gidamgo nga kalinaw sa kadaghanan ug malikayan ang pag-unay natong mga Pilipino.
RadyoMaN Joel Viray
