Nagpadulong sa Campo Delgado si Punong Barangay Keith ‘Dabing’ Espinosa sang Monica-Blumentritt , City Proper upod ang iya iloy kag mga kabataan agud kon tani makig-istorya kay PRO-6 Director PCSupt. John Bulalacao.
Apang suno kay PSupt. Joem Malong, spokesperson sang PRO-6, wala maka-istorya si Espinosa kay Bulalacao bangud yara sa Boracay ang PRO-6 Director.
Dugang pa ni Malong nga wala sila sang ideya kon ano ang tuyo ni Espinosa sa Regional Director.
Suno naman kay Bulalacao, wala sila sang dapat istoryahan ni Punong Barangay Dabing Espinosa kag wala man ini sang dapat kabalak-an kon wala sang sala kag wala sang may ginahimo nga illegal.
Si Punong Barangay Dabing Espinosa sang Monica Blumentritt , City Proper ang ginakabig sadto sang PNP nga high value target level 2 drug personality kag asawa ni Jing-jing Espinosa, anay kagawad sang amo man nga barangay, nga napreso kag gin-identify sadto sang PDEA- 6 nga drug personality sa idalum ni Melvin Odicta.
