Davao City – Dead on arrival sa balay-tambalanan ang usa ka Ian Phillip Pavico, 25 anyos, usa ka sales promo sa usa ka iladong mobile phone nagpuyo sa may Prk. 13 Seaside, Bago Aplaya ning siyudad human nga nalambigit kini sa bangga Sabado sa gabii diha sa may dalang Davao-Bukidnon Road, Prk. 1 Dacudao Tugbok District ning siyudad.
Base sa report, samtang nagmaneho ang biktima sa iyang Suzuki Raider 150 paingon sa Calinan mi-overtake kini sa multicab nga gimaneho ni Quirino Asoy, 55 anyos, driver-collector, taga-Talomo Riverside Calinan ning siyudad.
Matud sa traffic investigator sa Tugbok PNP nga susama og direction ang duha ka mga sakyanan paingon Calinan ug mi-overtake matud ang motor ug nasaghiran kini sa maong multicab hinungdan sa pagka-umod.
Grabeng samad ug bun-og ang na-angkon sa biktima nga gitabang sa Brgy. Mintal responders ug gidala sa pinakanduol nga balay-tambalanan.
Bandang alas-9:00 pasado gideklara nga walay kinabuhi si Pavico samtang gikustodiya na sa Tugbok PNP ang driver sa multicab.
RadyoMaN Paul Canono
