BACOLOD CITY – Patay naman ang isa ka driver sang motorsiklo matapos nga nabungguan ini sang isa ka taxi kagab-i sa reclamation area, Bacolod City.
Nakilala ang biktima nga driver sang motorsiklo nga amo si Arnel Edanio, 22 anyos ang edad, soltero kag pumuluyo sang Brgy. Sum-ag, ciudad sang Bacolod, samtang nakilala naman ang driver sang taxi nga si Ariel Palma, 51 anyos ang edad kag pumuluyo sang Burgos Locsin St., Bacolod City.
Suno sa imbestigasyon sang Police Station 1, may mga las 9:45 kagab-i samtang nagadalagan ang taxi sa area sang Palanca Road, Bredco Port sa reclamation karga ang duha niya ka pasahero nga buot kuntani niya idul-ong sa Northbound Terminal ginsiling sang driver nga ginbungguan siya sang motor nga gina-maneho sang biktima.
Base sa pagpangusisa, wala sang helmet ang biktima kag ginaalegar nga yara pa ini sa idalum sang inpluwensya sang makahulubog nga ilimnon.
Gindala pa sa Corazon Locsin Montelibano Memorial Regional Hospital ang biktima apang ini ang gin-declare dead on arrival./dyHB BACOLOD
