Polomolok, South Cotabato–Dead On Arrival sa balay tambalanan ang usa ka Randy Ting, 42 anyos usa ka driver ug nanimuyo sa Prk. Maharlika Barangay Magsaysay, Polomolok South Cotabato human nahutdan ug dugo human naunay sa kaugalingong pusil.
Nasayran nga adunay homemade nga shotgun ang maong biktima. Alas 9:30 ang takna sa buntag didto mismo sa ilang lugar. Sumala pa ni Police Captain Rommel Hitalia ang Deputy Chief Of Police For Operation sa Polomolok Municipal Police Station nga gibutang matud pa sa nasangpit ang iyahang armas sa iyahang bulsa ug sa dihang nag-ilis kini aksidente kining mibuto.
Naka-angkon matud pa ug igo sa iyahang paa ang bitkima samtang tungod sa nataranta ang mga kabanay, dugay nga nadala sa ospital ang nahisgutan, hinungdan nga nahutdan kini ug dugo sa dihang nahidangat sa hospital alas 10:26 ang takna sa buntag.
Ang nahisgutan ang myembro matud pa sa MNLF nga naka-base sa Polomolok ug posibleng gamit niya ang nahisgutang pusil isip proteksyon sa iyahang kaugalingon. Gikumpiska naman usab sa Polomolok PNP ang armas sa biktima ug gi-turn-over sa Crime Laboratory 12.(CDS)
