BACOLOD CITY – Wala nakasalbar ang isa ka retired elementary teacher matapos nga ini ang nabungguan sang motor kahapon sang kaagahon sa bangga sang Paglaum Village, Brgy.Mansilingan, Bacolod City.
Nakilala ang biktima nga si Salvacion Alejano, 69 anyos ang edad, pumuluyo sang block 21, Paglaum Village, Bacolod City.
Suno sa imbestigasyon sang Police Station 7, mga alas 5:45 kahapon sang kaagahon, ang biktima ang nagtabok sa dalan agud nga magbantay sang jeep agud magsimba sa Mansilingan.
Apang, posible wala niya sini nakita ang nagadalagan nga motorsiklo nga halin sa banwa sang Murcia buot magpadulong sa Bacolod gani ini siya ang nabungguan.
Bangud sang impact, nagtupa sa semento ang ulo sang biktima kag amo posible ang rason sang iya gilayon nga kamatayon.
Nakilala naman ang driver sang motorsiklo nga si Rommel Maca, 29 anyos ang edad, pumuluyo sang Brgy. Buenavista, Murcia.
Ginpahayag ni Maca nga mahinay lang ang iya pagpadalagan kag wala siya nakatalupangud sang nagatabok ang biktima./dyHB BACOLOD
