Nadakpang CTTMO admin staff awtomatik nga gitaktak sa serbisyo

33

Davao City – Gitanggal na sa City Transport and Traffic Management Office (CTTMO) sa serbisyo ang nadakpang administrative staff tungod sa pagpayuhot og shabu.

Giila ang suspek nga si Anthony Gell Almerez nga nadakpan sa gilusad nga buy bust operation sa Talomo PNP.


Gibutyag ni Dionisio Abude, CTTMO chief atol sa interbyu sa RMN Davao, manubag ang suspetsado sa criminal case ug gilayon na kining gitaktak sa serbisyo.

“Immediately anang adlawa sa pagkahitabo gi-dismiss dayon siya diria sa atong opisina,” segun niini.

Nasubo si Abude kay naapil ang pangalan sa CTTMO sa insidente apan gikalipay usab niiini ang pagkaaresto sa maong empleyado nga gahimo og illegal nga aktibidad subay sa kampanya sa kapulisan kontra droga.

Gisulti ni Abude wala pay tuig kini na-assign sa CTTMO gikan usab sa laing departmento sa lokal nga panggamhanan.



Busa gipasubay usab niini ang profile sa maong suspek aron masayran ang mga aktibidad sa nadakpang government employee.

Kahinumduman niadtong Hulyo 19, 2021 adlawng Lunes nadakpan kini atol sa buybust sa Purok Conception, Brgy. 74-A Matina Crossing diin nasakmit sa posisyon sa dinakpan ang anaa sa 4.2 gramos sa shabu nga adunay estimated street value nga P66,000.00


Sumala kang Talomo PNP station commander PMaj. Sean Logronio gikonsidera nila kining bigtime drug personality ug hagbay na kining ginamonitor hangtod sa malampuson kining nasikop sa ilahang operasyon.

Gipasakaan na kini’g paglapas sa Republic Act No. 9165 kun Comprehensive Dangerous Drugs Act.

Samtang, gitahasan ni Abude ang iyahang mga inspectors nga ipangmonitor ang mga personahe.

Nagbahad kini sa mga adunay illegal nga aktibidad nga mamahimo kining matanggal gayod kini sa serbisyo.

RadyoMaN Aimee Guinita

Facebook Comments