BACOLOD CITY – Duha ka anggulo ang ginalantaw karon sang pulis sa motibo sang natabo nga shooting incident sini gid lamang nga kaagahon sa Brgy. 2, Bacolod City nga nagtuga sang kamatayon sang isa ka biktima kag pagkasamad sang isa pa.
Nakilala ang napatay nga amo si Reymel Saldua, 22 anyos ang edad, single kag pumuluyo sang Purok Cagaycay, Brgy. 2 samtang samaron naman si Edmar Discutido, 21 anyos ang edad, residente sang Purok Lawayan, Brgy. Banago.
Ginpahayag ni PSInsp. Leo Estopa, hepe sang Station 2, may mga las 3:30 kaina sang kaagahon sa amo man nga lugar, ang mga biktima ang yara sa gwa kag naga-inom inom sang naglabay ang 2 ka mga suspek sakay sa motorsiklo kag hinali na lamang sila nga ginpangtiro.
Si Saldua nag-angkon sang igo sa iya braso kag 2 sa likod kon diin gin-declare dead on arrival sa Corazon Locsin Montelibano Memorial Regional Hospital.
Samtang si Discutido naman nag-angkon sang igo sa iya dughan kag gindala sa isa ka pribado nga ospital diri sa Bacolod.
Nahibaluan nga ang napatay ang may madamo nga atraso kag kontra kag may kaso pa sa illegal drugs.
Dugang pa ni Estopa nga posible may angut sa illegal drugs kag ang madamo nga kontra sang biktima nga napatay ang rason sa pagtiro sa iya./dyHB BACOLOD
