NAGHIKOG | Nag-inom inom sang Valentine’s Day, nagmaoy, nakastiguhan, ginpriso nagsuicide

BACOLOD CITY – Nasapwan nga patay na kag ginaalegar naghikog ang isa ka detainee sa Police Station 1 pasado las 6 kaina sang aga.

Ang biktima ginkilala gid lamang kay Alias Bebot, 27 anyos ang edad, tumandok sang Escalante City kag temporaryo nga naga puyo sa Magsungay, Bacolod City kag naga-trabaho bilang manug-galing sang mani.

Suno sa amo sang biktima nga si Carmelina Deguit, trabahante niya si Alias Bebot kon diin kagab-i naglisensya ini nga maglagaw upod sang duha pa niya nga kaupdanan.


Sini nga aga ginkadtuan sang pulis si Carmelina kag ginpabalo nga kuhaon niya sa Station 1 ang biktima, apang wala gid siya naglaum nga patay na gali ini sa alegasyon nga naghikog.

Samtang, sa imbestigasyon naman sang Police Station 1, ginpahayag sang hepe sini nga si S/Insp. Leo Estupa, pasado la una kaina sang kaagahon, gindakup si Alias Bebot sa reklamo nga alarm and scandal sa Hernaez St., Bacolod City.

Pasado las 6 naman sang nasapwan sang iban pa nga mga detainee nga may higot na ang liog sang biktima gamit ang tarpaulin nga iya ginlukot-lukot.

Ginpahayag nga nakainom ang biktima kag nagmauy ini rason nga gindakup sang pulis kag gindetain sa custodial facility.

May nakasugid man nga didto pa lang sa gin-imnan sang biktima, ini siya ang nakastiguhan na./dyHB BACOLOD

Facebook Comments