Nagpakilaeang Brigadier General ag 4 Star General arestado

Kalibo, Aklan – Arestado it mga kapulisan rong daywa ka mga persona nga nagpakilaeang Brigadier General ag 4 Star General kaina it agahon sa Kalibo MPS.
Base sa blotter report it Kalibo Police Station, nga si Ebenezer Alvares y Maypa, 54-anyos it Numancia, Aklan hay nag adto sa Kalibo PNP ag nagpakilaea pinaagi sa pagpakita ko anang ID bilang Brigadier General nga may badge no. 01-472 kay PO2 Genald Roxas kamana man si Jayven Aguelo y Flores, 33-anyos it Brgy. Panayakan, Tangalan, Aklan bilang 4 Star General.
Nag adto rong daywa sa Kalibo PNP para kunta boe-on ro andang ID it Royal Police Commission Law & Value and H-INTERPOLCOMM ROYAL POLICE kung sa siin makita sa nasambit nga ID ni Aguelo nga Sergeant ro anang rango ag may badge no. 01-2380 pero ro anang picture sa ID hay naka uniforme it 4 Star General.
Ro nasambit nga mga ID hay ginturn over sa Kalibo PNP it sangka police man nga assign sa New Washington PNP kung sa siin gina alegar nga rayang si Aguelo hay gin gamit na ro anang ID sa pagpakilaea bilang 4 Star General sa Gaisano Capital Kalibo.
Ro nasambit nga mga persona hay gin inpormahan ko andang constitutional rights ginkustodiya it Kalibo PNP.
Posible magapangatubnag rong daywa it kasong Usurpation of Authority.

Facebook Comments