Nagpayuhot sa illegal nga druga napusilan sa kapulisan, angol

Pagadian City – Samdan ang usa ka suspetsadong pusher human nga napusilan atol sa gihimong buybust operation sa kapulisan nga sakop sa Station Drug Enforcement Unit sa Pagadian City Police sa Purok Upper Bagong Silang, Balangasan, Pagadian City alas 11:30 kagahapon sa buntag.
Giila ang suspek nga si Kayser Surdias Tampipi , residente sa Barangay Lapirawan, Alicia, Zamboanga Sibugay.
Sa inisyal nga imbestigasyon nasayran nga samtang gihimo ang transaksyon nakamatikod ang suspek nga pulis ang iyang nakatransaksyon rason nga nibunot kini sa armas og gipusil ang pulis nga nagpatoong poseur-buyer dungan ang pagsakay sa XR 200 nga motorsiklo pabalik sa iyang agi.
Apan walay swerte ang suspek kay nakaplastar naman ang tropa sa kapulisan og gipusil sa pulis ang tiyan ug paa.
Mukabat ngadto sa duha ka sachet sa gituohang shabu ug P1000.00 nga marked money ang nakumpiska sa kapulisan gikan sa nahisgutan ug calibre 38 nga pistola nga dunay usa ka buhing bala.
Sa karon bantay sarado ang suspek sa Jamilia Hospital human nagpaalim pa kini sa iyang samad nga naangkon.

Facebook Comments