Nahitabong pagdunggab sa 15 anyos nga estudyante, nakaabot na kang CdeO City Schools Division Supt. De la Peña

Photo from fb of Dr. Jonathan S Dela Peña

Nakaabot na kang Cagayan de Oro City Schools Division Superintendent Dr. Jonathan Dela Peña ang nahitabong pagpangdunggab sa 17 anyos ngadto sa 15 anyos nga estudyante sa PN Roa National High School kagahapong adlawa.

 

Gipahayag ni Dr. Dela Peña nga iyang gitawagan ang principal sa tunghaan ug gimanduang tutukan ang kinabuhi sa bata pinaagi sa pagdala niini sa hospital.

 

Dugang pa sa maong opisyal, nga stable na ang sitwasyun karon sa kinse anyos nga biktima.


 

Tungod niini, iyang giaprobahan ang resolusyon sa GPTA sa PN Roa National High School nga mohimog Oplan Galugad  o susihon ang bag sa mga bata, aron masayran kung kini nagdala ba o wala sa kutsilyo o unsa mang hait nga butang.

 

Kini ang pahayag ni Dr. Dela Peña human usab sa nahitabong pagdunggab patay kaniadto sa estudyante ngadto sa usa ka maestro.

 

Tungod sa maong insidente kaniadto, gihulipan gilayon niadtong tungora ang kanhi principal.

 

Samtang, tungod sa kalit nga pagdako sa komunidad sa Barangay Canitoan hinungdang gitutukan karon sa Department of Education ang seguridad sa mga estudyante.

 

Gibutyag ni Dela Peña nga sa karon wala pa mahatud sa Division office ang incident report ug ila pa kining gipaabot.

 

Nasayod na usab kini nga aduna diay mga grupo o gang sulod sa maong tunghaan hinungdan nga iyang gi-aprobahan ang resolusyon niadtong Hunyo nga nagmando sa pagpahugot sa seguridad sa maong tunghaan.

 

Sa karon nakigkoordinar na ang principal sa tunghaan ngadto sa mga opisyal sa Barangay ilabina sa ilang Kapitan ug incharge sa peace and order aron matagaan sa aksyun ang maong insidente.

Facebook Comments