Nakauba ukon topless bawal sa banwa sang Tupi.

Nagpasar sang isa ka ordinansa ang Sangguniang Bayan sang Tupi nga nagabawal sa sin-o man nga maggwa sa mga pampubliko nga lugar nga nakauba ukon naka topless.
Base sa Ordinance No.739, series of 2018 ukon Anti-Topless or Half Naked Ordinance, ang may nagakaigo nga penalidad ang sin-o man nga magkadto sa mga pampubliko nga lugar nga wala sang bayo.
Katuyuan suno pa sini nga mapabilin ang order, protection of morality kag mapasanyog ang pagkadisiplinado sang mga pumuluyo sa banwa sang Tupi bilang isa ka tourist destination sa South Cotabato.
Sa Section 4 sang ordinansa ukon definition of terms, naked person ang tawo nga yara sa gwa sang iya residence nga wala sang pang ibabaw ukon pang idalom nga bayo ukon wala gid sang may ginasuksok nga panapton.
Lakip naman sa natumod nga mga public places amo ang dalan, alley, highway, playground, plaza, parks, open spaces, recreation centers, simbahan, public offices, kag iban pa nga lugar nga madamo sang tawo.
Samtang, indi naman sakop sini, ang mga special occasions kapareho sang mga fiesta celebration sa diin may ginahiwat nga mga cultural kag traditional events, mga tawo nga yara sa sulod sang ila private premises, mga aktibidad nga may special permit halin sa municipal government kag iban pa nga implementing agencies, medical emergencies, public swimming pools, beach ukon mga suba kag mga tawo nga naga engage sa sports ukon sport activities.
Pagadakpon naman ang mga tawo nga may diperensya sa paminsaron, kag indi man exempted ang hard labor workers sa diin kinahanglan sang mga ini nga magsuksok sang prescribed nga bayo sa ila nga pagtrabaho.
May-angot sini, ang Philippine National Police naman ang ginmanduan nga magpatuman sang amo nga ordinansa.
Ang magbayolar sini nga pahamtangan sang P 500 sa 1st offense, P 1,500 sa 2 nd offense, kag P2,500 ukon pagkapreso nga indi magsobra sang anum ka bulan depende naman sa desisyon sang korte.
Ang nasambit nga ordinansa ang naaprubahan sang Enero 28, 2019 kag sa subong ang ginapaidalom sa review sang Sangguniang Panlalawigan nga narefer naman sa Committee on Public Order and Safety.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>

Facebook Comments