NAKILALA NA | Detainee nga ginsiling nagsuicide nakilala na, SOCO nagapangusisa kon bala may foul play

56

BACOLOD CITY – (2nd Update) Nakilala na ang nasapwan nga patay na kag ginaalegar naghikog nga isa ka detainee sa Police Station 1 pasado las 6 kaina sang aga.

Ang biktima ginkilala gid lamang kay Ronald Tulib alyas Bebot, 36 anyos, tumandok sang Barangay Binagyuhan, Escalante City kag temporaryo nga naga puyo sa Magsungay, Bacolod City kag naga-trabaho bilang manug-galing sang mani.

Suno sa amo sang biktima nga si Carmelina Deguit, trabahante niya si Bebot kon diin kagab-i naglisensya ini nga maglagaw upod sang duha pa niya nga kaupdanan sa pagcelebrate man sang Valentine’s Day.

Sini nga aga ginkadtuan sang pulis si Carmelina kag ginpabalo nga kuhaon niya sa Station 1 ang biktima, apang wala gid siya naglaum nga patay na gali ini sa alegasyon nga naghikog.

Samtang, sa imbestigasyon naman sang Police Station 1, ginpahayag sang hepe sini nga si S/Insp. Leo Estupa, pasado la una kaina sang kaagahon, gindakup si Bebot sa reklamo nga alarm and scandal sa Hernaez St., Bacolod City.

Pasado las 6 naman sang nasapwan sang iban pa nga mga detainee nga may higot na ang liog sang biktima gamit ang tarpaulin nga iya ginlukot-lukot.

Ginpahayag nga nakainom ang biktima kag nagmauy ini rason nga ginpadakup sang pulis kag gindetain sa custodial facility para sa safekeeping.

May nakasugid man nga didto pa lang sa gin-imnan sang biktima, ini siya ang nakastiguhan na.

Ginhingyo na ni PSInsp. Estopa ang SOCO nga magpangusisa kag himuon ang post mortem examination para madula ang pagpangduha duha sang publiko sa diin ginpaidalom man sa inbestigasyon ang jailer nga si PO2 Chamson.

Facebook Comments