Patay ang anum ka tuig nga bata matapos ginbuno sang 22 ka beses sang iya tiyo sa Purok Sigay, Barangay Singcang Airport, Bacolod City kaina sang kaagahon.
Ginkilala ang biktima nga si Nonoy Antonio samtang ang suspek amo si Arnel Antonio sang nasambit nga lugar.
Base sa imbestigasyon sang kapulisan, manugtulog na ang suspek kag ang iya anum ka tuig nga hinablos apang ginpahayag ni Arnel nga may nabatian siya nga hutik rason nga nagkuha siya sang buckle knife kag ginbuno ang hinablos sang makapila ka beses.
Suno naman sa tiya ni Nonoy nga si Cherilyn Salgado, iya nabatian nga naga-aragoy ang hinablos sa pihak nga balay kag sang iya gin-usisa , nagapaligo na ini sa kaugalingon nga dugo.
Gilayon nga nagpalagyo si Arnel apang nadakpan sang kapulisan sa Purok 1, Magsungay, Singcang Airport alas 4:00 kaina sang kaagahon .
Preso karon sa Bacolod City Police Station 8 si Arnel kag tuman ang paghinulsol sang iya nareyalisar nga iya gid napatay ang hinablos.
Base sa report sang RMN Bacolod, nagagamit si Arnel sang shabu .
Nahibaluan nga si Nonoy ang ginbilin sang iya ginikanan kay Cherilyn Salgado apang antes natabo ang insidente, nag-upod ini sa tiyo nga si Arnel sa pihak nga balay agud didto magtulog.
(photo via RMN Bacolod)
