Dako ang pagpasalamat ni Vice Governor Atty. Katherine Agapay isip maoy national president sa League of the Vice Governor of the Philippines kon LVGP tungod sa malampuson nga pag-host sa probinsya sa Sarangani sa ilang ika-78 nga national assembly.
Segun ni LVGP National President Vice Governor Agapay gikan pa sa probinsya sa Laguna, iyang gidayig sila Sarangani Governor Steve Chiongbian Solon ug Vice Governor Elmer De Peralta tungod sa maayong pag-atiman kanila sulod sa tulo (3) adlaw gikan Oktubre 10 paingon Oktubre 12.
Isip presidente sa liga sa mga bise gobernador sa entiro Pilipinas, iya matud pang commitment ngadto kang Vice Governor De Peralta nga iyang unahon sa ilang pagtuyok ang isla sa Mindanao. Si Vice Governor De Peralta ang ilang gipili nga vice president for Mindanao. Ug tuod man, sa ilang ika-setentay-otso (78) nga national assembly gihimo nilang host ang Mindanao, Sarangani Province pa ang ilang napilian.
Napuno sa aktibidad ang ilang panagtigum ug walay nasayang nga higayon tungod kay human sa ilang gipahigayon nga mga lecture kabahin sa ilang continuing education ug capacity development aron mulig-on pa sila isip vice governor ug presiding officer sa nagkadaiyang sangguniang panlalawigan, ila pung nalibot ang mga dagkong investment nga namuntar pagpamatuod nga dako nag kausaban ang Sarangani ug Gensan. Pamaagi usab kini matud pa aron ipakita sa tanang bise gobernador sa nasud nga malinawon ang Mindanao, hilabi na ang Sarangani Province.
Ilang gi-tour ang Gensan Fish Port ug ang planta sa Sarangani Energy Corporation sa Kamanga, Maasim. Ila usab gibisita ang Kapitolyo sa Sarangani kung diin malipayon silang gisugat sa mga empleyado, ug mainiton pud silang gi-abi abi mismo ni Senador Manny Pacquiao sulod sa Mansion 2 pinaagi sa usa ka praise and worship dinner, sa pag-ayuda nila Sarangani Congressman Ruel Pacquiao ug OFW Family Partylist Congressman Bobby Pacquiao.
Ang ilang tema karong tuiga nga asembliya mao ang āSustainable and Inclusive Economic Growth and Food Security.ā Hinungdan nga alayon matud pa sa ilang tema ang ilang naadtuan nga mga area. Dili matud pa tanang probinsya sa Pilipinas ang may dagat sama sa Laguna nga didto naka-basi si LVGP National President Agapay, maong gikalipay niini nga makita ang Gensan Fish Port, kung diin ang libuan ka mga isda nga gina-deliber matag adlaw ang kasagaran ang gikan pa sa unom (6) ka munisipyo sa Sarangani.
Importante usab makita ang planta sa coal sa Sarangani Energy Corporation aron masaksihan sa mga bise gobernador nga nagpabiling hinlo sa kawanangan ang ilang operasyon tungod sa modernong teknolohiya nga gigamit. Magpabilin ang pag-protekta sa kinaiyahan hilabi na sa nag-usab usab na nga klima tungod sa climate change apan may mga modernong teknolohiya matud pa ang mutabang niini aron magpabilin ang gikaingon nga sustainable development, kalambuan nga wala gidagmalan ang kinaiyahan.
Sa bahin ni Governor Solon, iyang gitimbaya ang tanang vice governor sa mga kalihukan niini alang sa ānation-building.ā Dako matud pag responsibilidad ang papel sa usa ka bise gobernador ug ang sangguniang panlalawigan tungod kay sila ang ka-tandem sa gobernador sa pag-aproba ug pagpatuman sa mga programa ug proyekto. Nanghinaot na lamang si Governor Solon nga mailhan pa sa tibuok nasud ang Sarangani Province pinaagi sa maong League of the Vice Governor National Assembly kung diin nahimong host ang probinsya sa Sarangani sa pagpanguna ni Vice Governor De Peralta.
