General Santos City—Tulo ka mga samad ang naangkon sa usa ka negusyanteng giilang si Rodolfo Sanchez, legal age, residenti sa Townsite, Barangay Buayan, Gensan human kining gidunggab sa gituohang kawatan, alas 3:50 sa kaadlawon sulod mismo sa ilang panimalay.
Sa record sa Police Station 3 nasayran nga samtang natulog ang biktima sulod sa ilang panimalay, namatikdan nalang niini nga adunay kasikas sa ilang sala mao nga iyang gisuta apan paggawas niini sa ilang kwarto, gidunggab kini sa suspek tulo ka higayon sa lawas nga bahin.
Paspas nga misibat ang suspek sa wala masayring lugar samtang ang biktima gidala dayon sa ospital.
Basi sa inisyal nga imbistigasyon sa kapulisan walay nawagtang sulod sa panimalay sa biktima gumikan posibleng mao pa untay pagpanghagpat sa suspek sa mga butang nga iyaha sa biktima apan nakamata ang nasampit mao nga iya nalang kining gidunggab.
