Glan, Sarangani Province–Gikasuhan na sa Glan PNP ang negusyanteng si Jimlan Calatao, 59 anyos, nga taga Purok lower Dap, Barangay Datal Bukay, Glan, Sarangani Province kansa una nang nasikop atol sa gihimo nilang Search warrant operation niadtong nakalabayng adlaw.
Nasayran nga nakuhaan ang suspek ug pito ka bala sa carbine ug usa ka bala sa kalibre 45 nga pistola atol sa operasyon.
Matud ni Police Lt. Col. Neil Wadingan, Hepe sa Glan PNP nga ayha nila gihimo ang ronda, nakadawat sila ug report nga gipabuthan matud pa sa suspek ang hayop sa ilang silingan, tungod niini nagpahigayon ug search operation ang kapulisan aron nga pangitaon ang armas nga gihuptan niini, apan mga bala lang ang ilang narekober.
Gawas sa mga bala sa pusil nga nakuha gikan sa balay sa negusyante, pipila ka mga silingan sa nasampit ang misurender sa ilang mga armas ngadto sa kapulisan.
Rason matud pa sa mga nasampit nga sila nahadlok nga sila na usab ang sunod nga rondahon sa awtoridad.
Apan giklaro ni Wadingan nga dili sila apil nga kasuhan tungod buluntaryo man ang ilang pagsurender sa ilang mga armas.
