Arestado ang anay drug surenderee nga may ginapangatubang nga kaso pasado alas 4:00 sang hapon sang tinalikdan nga adlaw sa bahin sa Purok Pantua, Barangay Zone 3, Koronadal City, South Cotabato.
Ginkilala ang suspetsado kay Richie Lacamento Dapulang, yara sa legal nga pang-edaron, may asawa kag residente sang Purok Tagumpay Barangay GPS, Syudad sang Koronadal paagi sa warrant of arrest nga ginpapanaog ni Hon. Judge Lorenzo Balo sa kaso nga pagbayolar sa R.A. 9165.
Nakumpiskar sa supetsado ang dried marijuana leaves nga nasulod sa pakete sang sigarilyo, isa ka Honda XRM 125 kulay pula nga may plate no. 5728 ML kag kwarta nga nagabalor sang P4,886.00.
Sa interview sang RMN Koronadal kay Barangay Kapitan Bert Hinay sang Barangay Zone 3 sa nasambit nga syudad, bata ni Barangay Kagawad Dapulang sang Barangay GPS ang nadakpan nga suspek kag anay naman nga nadakpan sa kapareho nga kaso.
Sa subong, ang suspetsado ang yara sa kustodiya sang Koronadal City PNP para sa nagakaigo nga disposasyon.
