Davao City – Kasagaran sa mga residentes sa syudad sa Davao pabor nga atong sundogon ang ehemplo sa uban pang mga lokalidad sa nasud ug kalibutan diin hugot gibawal nga magbaton ug behikulo ang usaka motorista kun dili siya makatunol ug pruweba nga aduna siyay garahian sa iyang sakyanan.
Gipaboran sa mga tigpaminaw sa atong buntagong programang ‘Straight to the Point’ ang sugyot-balaudnon nga ipatuman ang ‘No Garage No Car Policy’ agig solusyon sa nagkagrabeng dagan sa trapiko sa mga nagtubo nga kasyudaran sama pananglit sa Davao.
Dinhi sa syudad, natawo usab ang suhestiyon nga tun-an ang posibilidad nga did-an ang mga lungsuranon nga basta-basta na lamang mopalit ug yunit sa sakyanan pampasahero man o personal hangtud nga makapakita kini sa sertipiko nga nagbaton siya ug igong probisyon alang sa parking space.
Ikaduha, natawo usab dinhi ang ideya nga haron mamenos-menosan kon dili man ugaling maresolbar ang traffic congestion nga idili na ang parking diha sa mga nag-unang kadalanan sa atong dapit ug ang pagmando sa kagamhanang lokal nga mangita gayud ug alternatibong parking space areas for public use.
Sa iyang kabahin, gisugilon ni Department of Transportation (DOTr) Assistant Secretary for Commuters Affairs Elvira Medina nga angay masabtan ang lohika ug merito sa naasoyng regulasyon ilabi na nagka-anam kagubot ang lakat sa atong panakayan hinungdan sa paghu-ot sa trapiko ug pagkalugi sa komersyo ug economic activities.
Base sa eksperyensya sa ubang metropolitan areas sa kalibutan, ila usab gipatuman ang maong reglamento sama didto sa nasud sa Japan, India ug Singapore diin ang buot makabaton ug behikulo angay mokuha usa sa gitawag nga Certificate of Entitlement diin rekwisito nga ikapakita ang pasilidad sa parking antes pa isyuhan sa papeles sa vehicle purchase and registration.
Kasamang June Duterte
