Nov. 8 hihimuon nga special holiday ngan ngangaranan nga "Leyte Resilience Day"

TACLOBAN CITY – Ha pagtigaman han Tacloban ngan ha bug-os nga probinsya han Leyte ha ika-lima nga anibersaryo han paglasurbo han Super Typhoon Yolanda, iginduduso ni Senate Committee Chair on Local Government Sonny Angara an pagdeklara han November 8 kumo special non-working day ha Tacloban ngan ha bug-os nga probinsya.

Ini in tatawagon nga “Leyte Resilience Day” special holiday para tagan hin honor an mga bayani o mga suvivors durante han paglasurbo han pinakamakusog nga bagyo ha kasaysayan an Super Typhoon Yolanda dida han tuig 2013.

Aada na ha Bicameral Conference ini nga bill matapos aprobaran han senado ngan kongreso ha third ngan final reading.


Sumala kan Sen. Angara, ini nga bill in magpapahinumdom ha mga Pilipino nga kinahanglan mag-andam ha mga kalamidad nga maabot.

Ini gihapon in magseserbe nga pasasalamat ha mga bumulig kay nakabangon an Tacloban, nakabangon an Leyte.

Mahihinumduman nga sobra 6,000 an namatay ngan sobra 1,000 an nawawara ngada yana.

An “Leyte Resilience Day” gihapon in makakabulig nga magpasabot ha kalibutan nga an trahedya sugad han Yolanda in nananabo ngan dapat pag-andaman.

Facebook Comments