NEGROS OCCIDENTAL – Gin-ako sang Leonardo Panaligan Command sang New People’s Army, LPC/NPA nga ginsilutan pinaagi sa pagtiro kag pagpatay ang isa ka katapo sang Barangay Peacekeeping Action Team ukon BPAT sang nagligad nga Martes sang aga sa Brgy. Guinpanaan, Moises Padilla.
Sa press release nga ginpagwa sang LPC NPA Central Negros Guerilla Front, ginpahayag sang spokesperson sini nga si Ka JB Regalado, nga si Micol Ruales, 32 anyos ang edad, residente sang amo nga lugar ang may kaso nga murder kag conspiracy nga ginaatubang sa rebolusyonaryong hublag.
Ginpahayag ni Regalado nga si Ruales ang imbolbado sa pagplano kag pagpatay sa district leader sang Kilusang Mambubukid ng Pilipinas nga si Jerry Turga sa Kinto Distrito sang probinsya sadtong April 28, 2018.
Ginaakusahan sang NPA si Ruales nga nagapa-tuta kay Mayor Magsie Peña sa amo nga banwa.
Madumduman nga gintiro si Ruales sadtong Martes, mga pasado las 11 sang udto sang riding in tandem kag ini ang naigo sa iya dughan kag ulo./dyHB BACOLOD
