OFW nagpatabang sa DXDC

Davao City – Malampuson nga na-rescue sa kapulisan sa Sasa ang mga minor de edad nga anak sa usa ka inahang OFW kinsa nagpatabang sa DXDC RMN Davao sa Disyembre 8 pinaagi sa social media.

Sa tulumanong Kuskos Batikos, nagpatabang si Hazel Borres, OFW sa Saudi Arabia, u g ang higala niini nga si Grace Dawit human ginakulata ang upat ka mga anak ni Borres sa iyang igsoon sulod sa ilang panimalay sa Doña Salud, Purok 8, Sasa ning syudad sa Davao.

Biktima mao sila si Therese Claire Borres, 18-anyos, pinaka magulang sa magsuon ingon man sila si alyas Dee nga 13-anyos, alyas Nic nga 12-anyos, ug alyas Yam nga 7-anyos samtang ang suspek mao si Rex Borres.


Atol sa rescue operation, nahinabi sa DXDC News Team ang magulang sa managsuon nga si Therese diin mitug-an kini nga hapit sila madunggaban sa ilang uyoan kagabii ug nasayran usab nga ginakulata sila matag uli sa suspek panahon nga hubog kini.

Sa mao sab nga operasyon, nakaikyas ang suspek gumikan sa ubay-ubay ka mga lutsanan sa maong dapit gani karon padayong ginapangita si Rex kinsa posibleng mag-atubang og kasong child abuse ug physical injury.

Hinuon, gipaniguro sa kapulisan nga makiha ang maong suspek ug aron dili na makadapat pa ngadto sa mga biktima kinsa sagad minor de edad.

Sa pagkakaron, papuy-on ang mga bata sa ilang parente sa mao ra sab nga lugar aron mabantayan kini.

Samtang mapasalamaton si Hazel ug Grace, kinsa anaa karon sa laing nasud, sa daling pagresponde sa ilang mulo.

RadyoMaN Jason Amisola

Facebook Comments