OFWs: MAYO PA NING FULL PROTECTION HALI SA GOBYERNO, ANO ANG DAPAT GIBOHON?

Good morning po sa mga paradangog kan DWNX….
Ipadagos ta po ang topic ta on OFWs.
Kan nakaaging sabado, natawan kita ning esapasyo ni radioman elmer abad para matokar ang RA 8042 o ang migrant workers act. Sabi ta po, overdue na kita sa pagrebisa kan mga nasyon kung sain kita nagpapadeploy ning mga workers arog kan mga nasyon sa middle east. Ta sabi sa:
SEC. 4, ang gobyerno puede lang magpadeploy sa satong mga OFWs sa mga nasyon kung sain ang derecho ninda protehido. Para sa mga taga Naga, mas ang importansya na maaraman ta kung ano ang mga specific rights kan satong mga parientes abroad saka kung pano kita mademand sa satong gobyerno ning tamang action para pirming masiguro na safe saka treated fairly ang mga loved ones ta abroad. Taano po ta mas dakula dapat ang interes kan mga Nagueno?
Sa bicol, ang Naga City ang igwang pinakahalangkaw na bilang ning OFWs base sa records kan OWWA. Kadaklan po sainda nasa Middle East (sa UAE, Saudi Arabia) saka sa Asia (sa Singapore, Hong Kong, saka Japan).
Ano po si mga dapat na ginigibo kan satong gobyerno para magarantiyahan kan pigdudumanan na nasyon ang protection sa derecho kan satong OFWs? Sabi sa ley, asin nakalaag man sa Omnibus Rules implementing RA 8042 saka RA 10022 na nag amienda,
(a) dapat and receiving country igwang labor saka social laws na nagpoprotehir sa rights workers, kabali ang migrant workers; or
(b) signatory/nakapirma sa multilateral treaty o international agreement manongod sa protection of migrant workers; or
(c) igwang bilateral agreement or arrangement sa satong government sa pagprotehir sa OFWs ta;
Mation ta po na arin man sa tolong ini puede na daang sabihon na suficiente na garantiya, PERO SA SAKONG OPINION, DAPAT ANG TOLONG CONDITIONS NA INI PRESENTE BAGO KITA MAGPALUWAS NING MGA OFWs para masabi na compliant ang gobyerno ta sa FULL PROTECTION TO LABOR, LOCAL OR OVERSEAS, BASE SA ARTICLE XIII, Section 3 kan presenteng Constitution. . .
Dagdag na requirement pa kan ley, apuera sa igwang nakasurat na mga rights for OFWs sa pinagtatrabahuhang nasyon, dapat actual man na pinag ootob kan nasyon nay an ang mga positive and concrete measures sa pagprotect sa satong workers, iba man po baga kaya ang taram lang sa gibo.
Ang DFA minamandohan na mag issue muna ning certification na yaon nanggad ang mga garantiyang yan, ang certification itinatao sa POEA. Nakadetalye si mga measures na igwa sa papadarhang nasyon. Obligado man ang DFA na reviewhon ini pirmi kun padagos ang receiving country sa pag-otob sa conditions. Kaya kung ma abroad po kamo, siguruhon na magcheck sa POEA kung ang DFA nagtao na ning certification. Taano po ta importanteng magcheck muna kamo?
Pag dai po kamo nagcheck, baka mabiktima kamo kan mga illegal recruiters na kasabwat kan mga nasa POEA sa basang na sanang pag approve kan saindong pagtrabaho abroad, ta nangyayari na nakakapadeploy sa mga nasyon na delikado para sa OFWs ta. In fact, sa ley, ang members kan POEA Governing Board na maboto a pabor sa Resolution allowing deployment kan migrant workers na mayong DFA certification, matatanggal sa trabaho, madidisqualify sa laog ing 5 years magkapot kan ano man na public office. Ang government official or employee na responsible sa pag issue kan work permit o nagtugot magpadeploy kan migrant workers na kontra sa garantiya kan ley o sa Resolution kan POEA Governing Board tanggal man sa trabaho.
Para sa mga sea-farers ta, si mga seaman halimbawa, ano man ang proteksyon kan ley para sainda?
Sabi sa ley, ang estado o gobyerno dai dapat magtugot magpadeploy sainda kung ang mga barkong sasakayan sa foreign seas or foreign installations na offshore o nasa tahaw kan dagat, kung ang mga maysadiri o employers dai compliant sa international laws and standards sa pagprotehir sa derecho kan migrant workers. Sigurohon nindo na makakua ning kopya kan certification kan POEA na ang employer kan saindong kapamilya compliant sa conditions kan ley. Aplikable man yan sa mga deployment to Companies and Contractors na may International Operations.
Ano po ang preferred kan ley na klase kan workers na puedeng ideploy abroad? Dapat po ang deployment para sa skilled Filipino workers.
Ang POEA minamandohan na ipublikar ang gabos na impormasyon manongod sa mga nasyon na pinagdedeployan kan OFWs ta, kabali ang labor and employment conditions, mga realidad o aktuwal na nangyayari sa mga nasyon nay an, saka klaradong impormasyon kung ang mga nasyon na ini nakapirma sa mga international standards on human rights and workers rights, para matabangan kita makapagdesisyon kung madagos mag apply ning trabaho duman, dapat pinapublish ini sa newspaper o ibang mas madaling paagi ning publication arog kan social media, sa website, o regular discussion sa TV. Dapat timely ang information na ini. Bakong kung kasuarin may nangyari ng pang aabuso sa OFW, saka pa lang mapaluwas ang POEA ning information sa situation kan nasyong nag violate.
Sa RA 8042 saka RA 10022, dinagdagan ang mga acts na konsideradong illegal recruitment. Kabali na po dyan ang gibo kan mga non-licensee o non-holder ning authority to recruit kan arin man sa minasunod:
• Pag withhold o pag deny ning travel documents hali sa applicant workers bago kan departure for monetary or financial considerations, o iba pang dahilan na dai kabali sa lista kan Labor Code and implementing Rules; • Pagpalyar na actual na ma deploy ang sarong contracted worker na mayong valid reason base sa pagdetermina kan DOLE.; • Pagpalyar na ma reimburse ang gastos kan worker in connection sa documentation saka processing for purposes of deployment, sa mga kaso ning deployment na dai nadagos na bako man sala kan worker;
Pag ma abroad po baga ang OFWs ta, wala tuo ang utang para may maigastos. May mga recruiters po na nagpapautang sainda, igwa man mga pariente o amigo/amiga na natabang financially. Ano po ang sabi kan ley about this?
Bawal po ang magpautang sa OFW na may interest na sobra sa eight (8%) percent per annum, ang inutang gagamiton sa pagbayad kan legal and allowable placement fees na ang kondisyon iyo na ang worker required mag issue, personally o sa paagi ning guarantor or accommodation party, ning postdated checks.
Bawal sa sisay man na mag imponir ning condition na ang OFW mag avail ning loan exclusively sa saro lang na designated institutions, entities, or persons.
Ano po palan ang sabi sa ley about pagpa examine kan salud kan OFW?
Bawal man po ang mag impose na maging compulsory saka exclusive lang mag undergo ning health examinations sa specific lang na medical clinics, institutions, entities or persons, apuera sa kaso kan mga seafarers na ang medical examination cost shouldered kan saiyang principal o shipowner.
Sa mga patraining sa OFWs, ano man po ang sabi kan ley? Bawal man mag impose ang sisay man, na magrequire ning compulsory saka exclusive arrangement na ang OFW ma undergo training, seminar, instruction or schooling sa designado lang na institutions, entities or persons, except sa mga recommendatory training na pigmamando kan principals/shipowners basta sagot ninda ang gastos sa training.
Dakul pa pong rights ang mga OFWs ta na puede ta tokaron. Kulang lang kita sa oras ngonian. Pls send your texts sa DWNX kung may mga hapot sa bagay na yan.
Bago ako magpaaram, para po sa mga OFWs ta, and for all workers, whether in government or private sector, remember ang mawot kan Diyos kung kisay ta dapat ialay ang satong hard work. Kung kita magiging devoted saiya, itatao Nya man ang maninigong proteksyon sato, sa pamilya ta, sa mga mahal sa buya, sain man kita magduman sa kinaban, itatao nya sato ang kaogmahan asin ganansya sa buhay. Sabi sa bible sa –
Proverbs 14:23
23 All hard work brings a profit, but mere talk leads only to poverty.
And sa –
Colossians 3:23
23 And whatsoever ye do, do it heartily, as to the Lord, and not unto men;
God bless you all.
Ini po si Atty Angel Ojastro III.
Aramon an saindong derecho, INI AN LEY!!!

Facebook Comments