Opinyon: Porma sa disiplina padayong gidebatehan

Davao City – Suportado sa Parents Mobilization Action Group (PMAG-Davao City) ang bag-ohay na aprobahan nga final version sa Anti-Corporal Punishment regulation diin pirma na lang ni Pres. Rodrigo Duterte ang kulang aron hingpit nang mabalaud kini.

Sumala ni PMAG President Febe Matthew nga sa panahon unya nga mahimo na kining balaud, mapitol na unya ang mga ginikanan gikan sa dili maayo nga matang sa pagdisiplina sa ilang mga anak sama sa pagbunal.

Segun ni Matthew nga dili maayo alang sa usa ka bata nga sa matag sipyat ug pagbadlong tugbangan og bunal sanglit dili kini epektibo nga pamaagi inay magpagahi hinoon kini sa pagbati sa bata hinungdan nga magtanum sila sa pagdumot ngadto sa mga ginikanan ug kang bisan kinsa.


Daghang pamaagi sa pagdisiplina sa mga bata karon nga wala na kinahanglana ang pisikal nga pagpanton sama pananglitan sa pagbakwi sa mga gadgets o dili ba kaha dili paghatag og baon sulod sa pila ka adlaw ug uban pa.

Dili na matud pa tukma ang kinaraang pamaagi sa pagpitol sa mga anak sama sa naagian sa mga nahaunang mga kabataan gikan sa ilang mga ginikanan nga kung makadisiplina nag-apil sa pagsulod sa sako ug ibitay sa punoan ug paasohan, pagpasabot ni Matthew.

Kini nga regulasyon pamaagi kini aron putlon sa hingpit ang Kinastila nga istilo sa pagdisiplina sa punto nga dili kini garantiya aron matarong ang kinabuhi sa bata inig kadaku inay magpahimo hinoon kini kanila sa pagkabadlungon og maayo.

Hinoon dili supak si Matthew sa pagbunal kung ang gamiton palad sa kamot unya ang dapatan mao ang lubot apan sa hinay nga paagi samtang ipakita nga nasuko ka sa sayop nga nabuhat sa bata.

Ubos sa bag-ong balaud, ang bisan kinsang masakpan nga manapat sa bata puwede pasakaan og kaso sa korte subay sa Section 5 gawas kung dili bug-at ‘aresto mayor’ lang ang ipahamtang nga silot.

RadyoMaN Joel Viray

Facebook Comments