Opinyon: Samal resorts warning tinud-on

Davao City – Gipahingusgan karon sa Kinaiyahan Foundation nga angayan lamang tinud-on sa gobyerno ang bahad niini nga pasirad-an sa hingpit ang mga resorts sa Island Garden City of Samal (IGaCoS) kinsa mapamatud-ang nakalapas sa mga lagda sa balaud gitumong sa pagprotehir sa atong kinaiyahan.

Gihagit karon ni Betty Cabasares, Kinaiyahan Focal Person, ang kagamhanan nga dili lang hangtud huraw kon dili, tinud-on gayod nga padlakan ang 30 ka mga ‘erring resorts’ sa Samal gumikan sa pagguba sa kinaiyahan.

Nasuta nga ang wala nganli nga mga resorts nadiskubrehang walay kaugalingong ‘waste water treatment facility’ diin ang ilang mga basura ug hugaw mopaingon sa dagat nga walay treatment aron pag-mitigate sa ecological effects niining matang sa water contaminants.


Nanghinaut si Cabasares nga dili na langayon pa sa kagamhanan ang bahad niini aron dili masusama sa Boracay ang Samal tungod sa mga tag-iya og mga resorts nga walay kasingkasing sa kinaiyahan.

Gibarugan ni Cabasares nga mapitol lang ang mga pasaway nga resort owners kung makita nila nga ang gobyerno adunay political will ug determinadong mopatuman sa waste management law sa ingon dili kini sundugon sa uban.

Ang pagpreserba sa kinaiyahan karon dili lamang alang sa presenteng henerasyon apan alang kini sa mosunod pa nga mga kaliwatan aron sa ingon, wala silay masaway or ikamahay ngadto sa mga nahauna nilang mga katigulangan.

RadyoMaN Joel Viray

Facebook Comments