*OTORIDAD TA HACE EMBUSCADA CON EL BLANCO VAN ABORDO SUSPECHOSO MGA PERSONA*
*BHONG SIMBAJON*
El mga personajes del policia ta hace aura embuscada con el un blanco Toyota Revo van donde abordl el alegoa cuatro mga suspechoso persona que amo asegun el ya pricura abducta con el un high school estudyante adelante mismo del escuela elementary na Sta. Maria ayer.
El un mujer estudyante del Zamboanga City State Polytechnic College ya reporta na Sta. Maria Police Station cay chene asegun cuatro desconosido persona el ya pricura conele hala adentro del van blanco pero ya fuede privini su tata si Albert Grio, un activo myembro del Philippine Army.
El estudyante residente de Barangay Cabatangan ya relata con el otoridad cay el su tata ya fuede ya nota con el blanco van ta sigui canila na detras desde ya sale sila na residencia del su tiya.
Cuando ya llega asegun sila na Segundo gate del Sta. Maria Elementary School, tres persona el ya alumbra canila y ya pricura hala con el mujer para na diila vehiculo pero ya pricura este resisti.
Ensiguidas tambien el tata del mujer ya abaja na vehiculo y ya confronta con el mga desconosido persona.
Asegun con el victima, ya manda conose estos mga suspechao como myembros asegun sila del PDEA, y bueno ya lang asegun cay talya su tata quien ya grita conesos y ya manda conose cay myembro ele del military si porque ya larga essos con el victim y el vehiculo ya corrre asegun para na direccion del fueblo.
Porcausa de este, manada del mga mayores del mga estudyante desde Sta. Maria Elementary School el malingasa aserca el soceso y el diila seguridad. – *Bhong Simbajon/RMN News*
