BACOLOD CITY – Dalayawon ang ginhimo sang isa ka taxi driver nga pag uli sang isa ka wallet nga nabilin sa iya salakyan sang iya pasahero nga may unod masobra P12 mil pesos.
Si Angiegar Castellano, 48 anyos, residente sang Purok Greenfield, Brgy. Tangub, Bacolod City, driver sang Miracle Taxi ang nagpadulong personal sa istasyon sang DYHB RMN Bacolod agud iturn-over ang wallet nga kolor itom nga nagabilin sang iya pasahero.
Upod si Radyoman Mel Benedicto, ini ang ginpahibalo sa kahanginan.
Ang wallet, base sa ID nga yara sa sulod ang iya ni Charie Franco, pumuluyo sang banwa sang Pulupandan.
Suno kay Manong Angiegar nga may mga las 2 sini gid hapon, ang amo nga pasahero ang nagsakay sa iya halin sa atubang sang Regional Hospital kag nagpanaug sa San Sebastian.
Pahayag sang driver nga ulihi na niya natalupangdan ang amo nga wallet kag sang iya ginlantaw, ini ang may unod nga kwarta nga cash nga nagdangat sa masobra P12,000 pesos subong man mga importante nga ID.
Angut sini, gilayon nga gin-contact sang DYHB ang tag-iya sang wallet kag ini ang personal niya nga gin-claim.
Nagpahayag sang daku nga pasalamat ang pasahero bangud sa katampad sang driver nga wala gid na-tentar agud taguon ini.
Si Angiegar Castellano ang kasado kag may duha ka mga kabataan nga lunsay mga babayi./
