P200M nga dredging project sa San Emrique nagsugod na

SAN ENRIQUE – Ginkalipay ni Mayor Jilson Tubillara sang San Enrique ang kapin P200 milyones nga proyekto gikan sa Department of Public Works and Highways nga pagpalapad kag pagpadalum sang kapin napulo ka kilometros nga suba sang Bagonawa kag sapa sang Cansonsing nga nasakupan sang Brgy. Tabao Rizal.

Suno kay Tubillara ang banwa sang San Enrique amo ang tilipunan sang tanan nga tubi nga nagahalin sa La Carlota, Murcia kag Bago kabangdanan nga bisan indi mag-ulan sa ila banwa nagakakibot nalang ang mga pumuluyo nga nagadalum ang tubi.

Dugang pa sang alkalde nga ang orihinal nga kalaparon sang suba amo ang kapin 14 metros apang bangud sang mga lay-on mga 5 tobtob 7 ka metros nalang ang nabilin kag tuman nalang ka nabaw.


Ginabulubanta nga matapos ang ini nga proyekto sa sulod sang isa ka tuig.

Samtang nagpasalamat naman si Brgy. Kapitan Enriquetta Galimba bangud isa gid ang iya Barangay nga amo ang Tabao Rizal nga apektado sang baha pananglitan nga mag bubo ang madamol nga ulan./Grace Supe

Facebook Comments