Subling mopahigayon ang buhatan sa National Food Authority kon NFA Bukidnon sa pagpamaligya og NFA Rice sa tag P27.00 matag kilo karong adlawa Lunes ug karong Miyerkules, September 12.
Sa interview sa RMN ngadto kang Ma. Socorro Melomida ang information officer sa NFA gibutyag niini nga muhimo sila sa pagpamaligya diha sa NFA Provincial Office, Malaybalay City; NFA Aglayan Warehouse; NFA Valencia City Warehouse ug NFA Maramag Warehouse. Gitawag kini nga “Bigasan sa Compound”.
Makapalit hangtud sa lima (5) ka kilo ang matag kustomer ug gihangyo nga magdala ug sudlanan. Magsugod sa alas 10:00 a.m. ang pagpamaligya sa NFA Rice karong adlawa sa maong mga lugar.
Tambag usab niini nga magdala ug kuarta nga ibayad insakto o P135.00 sa lima ka kilo para dili na malangan sa sinsilyo.
Nanghinaut usab ang NFA nga pinaagi niining “Bigasan” makatabang ang ilang buhatan nga moabot ang bugas sa atong gobyerno diha sa mga katawhan nga nagkinahanglan sa barato ug kalidad nga bugas diri sa atong probinsiya sa Bukidnon.
