PACKAGE FROM U.S | Vice-Gov Lacson ginpatawgan SWAT ang package nga iya nabaton gikan sa tawo nga indi niya kilala halin sa U.S

4874

BACOLOD CITY – Ginpatawgan sang Special Weapon and Tactics (SWAT) ni Vice Governor Eugenio Jose ‘Bong’ Lacson ang package nga iya nabaton gikan sa Long Beach California, USA.

Ini matapos nga wala man sang gin-expect nga package ang bise-gobernador halin sa Amerika, ngaa nga ginpadal-an sya.

Las 9 sang aga sang napuhag si Lacson bangod man sa package nga iya nabaton nga una ginreceive ni Christian Siocon sang Vice-Governor’s Office sang Mayo 12 kag ginpadala sa Sta. Clara Estates Office. Ang Sta. Clara Estates naman ang nagpadala sa iya balay sa Sta. Clara Subdivision.

Bangod sa kasakuon, kaina lang ini natalupangdan ni Lacson sa diin, iya gintawgan si PNP Provincial Director Rodolfo Castil kag nagpangayo sang panugyan.

Panugyan ni Castil nga indi ini pagbuksan, ginpadal-an nya ini sang SWAT sa pagpanguna ni PSInsp. Mara.

Ginpatawgan man ini sang bomb sniffing dog sang Philippine Coastguard.

Na clear ini mga pasado las 10 sang aga tubtob nga nagdesisyon si Mara nga buksan ang package matapos nga ginpasimhutan ini sa ido.

Normal nga package ang unod kaangay kape, pinggan, saucers, bayo, kalamay kag chocolate drinks.

Natingala si Vice-Governor Lacson, bangod wala man nagagana ang duha ka mga numbers nga ara sa package sang ila ini gintawgan. Disconnected ang landline number kag wrong number na ang cellphone.

Ini ang gikan sa kay Joe G. Baltazar, 83 anyos sang Long Beach California, nga ginapatihan supporter ukon tagsakdag ni Lacson.

Ang amu nga package ang igaturn-over naman sang bise-gobernador sa Bacolod Boys Home.

Para kay Castil, insakto ang ginhimo ni Lacson nga wala ini gilayon ginbuksan ilabi na gid nga indi niya kilala ang shipper.

Facebook Comments