TACLOBAN CITY – Patay an usa nga padi matapos nga mabunggo an iya ginsasakyan nga ford ranger han usa nga truck nga nawarayan hin preno ha Brgy. Naparaan, Salcedo, Eastern Samar.
Ginkilala an padi nga namatay nga hi father Moises Mel Alde Campo, 50 anyos, parish priest ha Guiuan, Eastern Samar ngan residente ha Brgy. 1, Llorente, Eastern Samar.
Ha inisyal nga imbistigasyon han mga kapulisan, nagawas nga samtang nga ginbabaybay han truck an kakalsadahan han Salcedo in nawarayan hin kontrol ha steering wheel an drayber rason nga nagpabali-baliko na an behikulo ngan an opposite lane an ginbaybay hini ngan didto na nagbungguay.
Ha kakusog han impact, naangkon ni father Campo an serious physical injury, nadara pa hiya ha Felipe Abrigo Memorial Hospital han Guiuan pero gindeklara na ini nga patay na.
Samtang, kumalagiw dayon an suspek matapos an insidente, waray pa liwat identipikasyon ano an ngaran hini.
Padayon an imbistigasyon ngan hot pursuit operation han mga otoridad agud madakop an suspek.
