Davao City – Mas gipahugtan ang pagbantay sa kapulisan ug kasundalohan sa checkpoint sa Task Force Davao ilabina ang pag-inspection sa mga sakyanan de pasahero nga mosulod sa Davao agi sa Barangay Licanan, Bunawan district ning syudad.
Adunay mga kabalaka nga mosulod ug mangahas paghimo’g kasamok ang grupo sa mga terorista dinhi sa syudad human namatay si Cayamura Maute, ang amahan sa mga Maute brothers nga namuno sa kagubot sa Marawi.
Si Cayamura nasikop sa checkpoint sa Task Force dinhi sa Davao. Ang grupong Maute mao sab ang gitudlong utok sa pagpamomba sa Roxas Night Market dinhi sa syudad mag-usa ka tuig na karong Setyembre dos, diin nikalas ug kinabuhi sa kinse ka mga tawo.
Sumala ni Police Chief Inspector Estrello Ramiso, station commander sa Bunawan PNP nga angay magmaigmaton sa kanunay ug makig-alayun sa kapulisan ang katawhan kun adunay mamatikdang kadudaduhan, daling i-report sa mga otoridad ug dili makigkunsabo sa mga grupo nga supak sa Gobyerno.
Kasamang Don Pulayao
