Nangin mainit man ang pagbayluhanay sang argumento sa tunga sang debating team sang University of San Agustin kag Western Institute of Technology sa ikaduha nga hugnat sang Punto por Punto Inter-School Debate Competition nga ginhiwat kahapon sang hapon sa Robinsons Place Jaro.
Gindebatehan sang duha ka grupo ang isyu kon bala dapat tungaon sa duha ka distrito ang siyudad sang Iloilo.
Yara sa affirmative side ang University of San Agustin kag negative side naman ang Western Institute of Technology.
Sa pagtapos sang debate, nagpangibabaw ang University of San Agustin kontra sa Western Institute of Technology kon sa diin ginkilala bilang best speaker kag best debater si Edward Dominic Emilio sang AB Political Science sang nasambit nga unibersidad.
Sa masunod nga domingo, maga-atubangay naman ang debating team sang West Visayas State University kag University of San Agaustin.
