TACLOBAN CITY – Iginkakaalarma yana han Philippine National Police (PNP) an pagdamo hin mga diri lisensyado nga armas ha Calbayog City, Samar, ini in matapos makumpiska han mga kapulisan an mga armas ngan granada ha mga Brgy. Officials han Patong Happy Valley ha Calbayog City, Samar dida han martes.
Sumala kan PCInsp. Sulpecio Jabagat, tagapagyakan han Samar PNP, iginkakabaraka ini nira tungod nga ha usa pala nga barangay damo dayon nga mga armas an ira narikupo.
“Masasabi na rin natin yan na alarming lalo na nasa isang barangay lang sila, di naman natin maano [makita] ang possibility na siguro baka hindi lang sila ang mayron kasi imagine apat pa lang sila sa isang barangay ang nahulihan natin.”
Magkadurudilain nga mga armas an narekober han mga kapulisan durante han raid ha mga panimalay nira Brgy. Kapitan Jemuel De Pablo ngan tulo nga iba pa.
An mga operatiba in may dara-dara nga search warrant nga gin-issue ni Judge Agerico Avila han Regional Trial Court Branch 29 han Catbalogan City.
Dugang ni Jabagat, posible nga preparasyon ini han mga suspek yana nga tikaarabot nga 2019 Elections.
“Posible na masasabi natin na preparation ito kasi malapit na ang eleksyon.”
Nahipapausa naman an opisyal kun ano iton paggagamitan hini nga mga armas, diri man pulis o militar an mga suspek. Waray pagud mga lisensya an mga ini.
Diri naman makompirma ni Jabagat kun parte ba han Private Armed Group han Samar an mga suspek.
Mas ginpapakusog yana han mga kapulisan an ira kampanya kontra ha mga nagtatago hin armas ilabi na nga tikahirani na an eleksyon.
