Paghinay sa operasyon batok sa illegal nga droga, gihimakak sa PNP 10

26
Gihimakak sa Police Regional Office (PRO)– 10 nga niundang sila sa kampanya batok sa illegal nga droga.

Sa interview sa RMN Malaybalay ngadto kang PNP 10 Regional Spokesperson Police Lt. Col. Michelle Olaivar, gibutyag niini nga aduna silay mga istoryang nadunggan nga ma-undang ang kampanya batok illegal nga droga pagnaug ni kanhi Pangulong Rodrigo Duterte sa iyang posisyon.

Apan giklaro ni Olaivar nga dili tinood nga nag-undang sila gani nagpahigayon sila og sunod-sunod nga operasyon batok sa illegal nga droga.

Gani sa milabay’ng semana lang, adunay operasyon ang ilang gihimo sa siyudad sa Cagayan de Oro ug muabot sa halos tungag milyon nga kantidad sa droga ang ilang nakumpiska, gawas pa kini sa operasyon nga ilang gihimo kung asa nakakumpiska usab sila ug halos P300,000 ka kantidad sa gituohang shabu.

Dungan niini gisiguro sa PNP nga magpadayon ang ilang kampanya batok sa illegal nga droga.

Gidugang ni Col. Olaivar nga usa usab kini sa mandato karon sa bag-ong PNP Chief nga si Police Gen. Rodolfo Azurin, Jr. ang pagpadayon sa war on drugs sa gobyerno.



Sa iyang speech sa Camp Crame alang sa iyang pormal nga paglingkod, gibutyag ni Azurin nga mahimong prayoridad ninii ang rehabilitation drive sa kampanya sa illegal nga droga.

Mao usab kini ang mando ni DILG Secretary Benjamin Abalos Jr. sa kapulisan sa rehiyon sa iyang panagtagbo sa kadagkuan sa PNP 10.


Sigun ni Olaivar nga gimanduan ni Secretary Abalos ang regional director sa PNP 10 nga limpiyuhan ang kadalanan batok sa illegal nga droga samtang istriktong gisunod ang rule of law ug pagtahod sa human rights.

Facebook Comments