Pagpasakay ngan pagpahaw-as hin pasaheros ha atubangan han mall ha Marasbaras, diri na pwede

TACLOBAN CITY – Ber months na naman sanglit ginlalauman nga pira la kasemana iton malabay magigin crowded na naman an syudad tungod nga damo iton mamamalit para ha tikaarabot nga pasko.

Sanglit an TOMECO, naghimo hin pamaagi para diri magin crowded an syudad partikular an Marasbaras kun diin nahimumutang an Robinsons Place Mall.

Sanglit sumala han TOMECO, an tipakadto ngan tipauli tikang ha Robinsons Marasbaras in diri na pwede direkta nga tumabok ha kakalsadahan, kinahanglan gamiton an overpass.


An mga Public Utility Vehicle (PUV’s) naman in diri na pwede magpasakay ngan magpahaw-as hin pasahero ha kalsada nga atubangan han mall. Ngatanan naman nga Public Utility Jeepney (PUJ’s) in kinahanglan na nga dumeretso tipakadto ha New Passengers Terminal nga nahimumutang ha likod han mall ha Marasbaras ngan didto na magpapahaw-as ngan mapapasakay hin mga pasaheros.

Sumala kan Jobs Lagutan, tagapagyakan han TOMECO, damo iton mga kritisismo hini nga bag-o nga development pero ira daw la ginhihimo iton ira trabaho nga solusyunan an problema han trapiko han syudad.

Ginbutangan gihapon hin temporary barriers ha butnga han kalsada dapit ha may mall ha Marasbaras para malikayan an pagtabok han mga tawo.

Dugang ni Lagutan, nagpapadayon an himangrawon han Tacloban City Government ha proposal nga butangan hin concrete barriers an kakalsadahan han Marasbaras.

Facebook Comments