Pagtaas sa ihap sa mga nagkasakit sa tipdas sa Cagayan de Oro, gikaalarma sa City Health Office

23

Naalarma karon ang mga personahe sa City Health Office sa pagtaas sa ihap sa mga pasyenteng dunay tipdas sa Cagayan de Oro.

Matud ni Dra. Fe Bongcas sa City Health Office nga basi sa ilang record, dunay 75 kaso sa tipdas ang natala sa syudad gikan Enero Uno hangtud 13 ning bulan sa Pebrero.

Mas doble matud pa kini sa ihap sa dunay tipdas sa nakalabayng tuiga nga dunay 40 ka kaso.

Sa maong ihap, lima niini ang namatay gikan sa Barangay Cugman, Balulang, Macanhan, Dansolihon ug Mambuaya.

Apan padayon pa ang gihimong testing kung kumpirmado bang tipdas ang hinungdan sa pagkamatay sa mga biktima.

Gidugang ni Dra. Bongcas nga prayoridad nila karon ang mga batang dunay edad unom ka bulan hangtud lima ka tuig aron makalikay sa sakit nga tipdas.

Plano usab nilang ilakip sa measles vaccination ang mga tinun-an gikan grade 1 hangtud grade 6.

Facebook Comments