Pagtuon sa SOCO sa kamatayon sa magkapuyo nga nakit-an sa alabel may resulta na

15

Alabel, Sarangani Province–Napailawom na sa otopsiya ang patayng lawas sa mag live in partner nga nakitang patay sa likod nga bahin sa STL outlet didto sa Alabel Sarangani Province niadtong adlawng Sabado.

Gibutyag ni Alabel PNP Chief Police Major Salgado nga migawas sa resulta sa otopsiya nga gipahigayon sa RCLO Region 12 nga dunay mga bun-og sa dughan ang mga biktimang sila si Alona Pasilan og Mario Poras, mga residente sa Surallah South Cotabato.


Apan matud ni Salgado Nga dili kini maoy gikamatyan sa duha kundili ang pagputos og tape sa ilang ulo nga hinungdan nga wala sila makaginhawa hangtud nakabsan sa kinabuhi.

Gikanayon usab ni Major Rey Salgado nga sa karon wala pa silay tin-aw nga motibong matumbok kalabutan sa kamatayon sa duha ka mga biktima.

Dugang pamahayag ni Major Salgado nga kung basehan ang resulta sa paghiling sa SOCO posibleng patay nang daan ang mga biktima ayha paman sila gibyaan sa lugar hain sila nakit-an.

Sa karon nakasentro ang ilang pagsusi kung unsay gisakyan og paunsa nga nakasulod sa munisipalidad sa alabel ang mga lawas sa mga biktima.

Kalabot niini dili pa usab makompirma kung dunay koneksyon ang pagkamatay sa duha ka mga biktima Alabel sa nakit-ang patayng lawas didto sa Malungon Sarangani Province.

Padayon sumala pa ang ilang pagkuha ug dugang mga ibidensya bahin sa maong krimen hangtud sa muabot ang higayon nga ilang matandi ang duha ka mga hitabong krimen.

Kahinumduman nga halos dungan nga nadiskobrehan ang patayng lawas nila ni Alona og Mario og ang biktimang taga Gensan nga si Junaid Molok didto sa Malungon.(Jordan Britos)

Facebook Comments

From Advertisers