Davao City – Malaumon ang pamilya sa Dabawenya ug Pinay boxer nga si Nesthy Petecio, 29-anyos nga makab-ot niini ang kadaugan sa nagpadayong 2020 Tokyo Olympics human nakasulod sa Women’s Featherweight division finals sa naasoy nga kompetisyon.
Sa ekslusibong interbyu sa DXDC RMN Davao kang Prescilla Petecio, inahan ni Nesthy, gisaysay niini nga 9-anyos pa lamang ang iyang anak sa dihang nagsugod kini og training ug 11-anyos kini nasugod og dula sa boxing ring ug ang boxing trainor ang amahan sa Crossing Bayabas National High School dinhi sa Davao City.
“Kada training sa mga bata muapil ni si Nesthy. Dili siya tugtan sa iyang papa, muapil man gyud sya gyud. Unya nakitaan sya sa iyang papa nga naa siyay potensyal, kagalingan sa boxing so gisabay nalang pud siya sa training, sabay sa sparing hangtud nga nakadula siya sa (boxing) ring,” saysay sa inahan.
Dugang sa inahan ang pamilya ang nahimong inspirasyon ni Nesthy nga makasulod sa national team sa boxing sa rason aron mahaw-as sa kalisod ang iyang pamilya.
“Ang amo lang gyud na pagsalig sa iyaha nga naa gyud siyay kakayahan nga maabot siya ana nga higayon nga makab-ot niya.. naa na siyay medal nga nakuha ug pagsalig pud namo sa Ginoo nga wala gyud Niya gipasagdan si Nesthy sa tanan nga laban,” sulti niini.
Mudula karong adlawng Sabado (July 31, 2021) kontra Italy, ang pinay boxer ug sigurado na usab nga makakuha sa Olympics medal ug adunay tsansa nga makaangkon og bulawang medalya.
RadyoMaN Kirby Manzon
